et dixit ad me fili hominis quodcumque inveneris comede
comede volumen istud et vadens loquere ad filios Israhel
et aperui os meum et cibavit me volumine illo
et dixit ad me fili hominis venter tuus comedet et viscera
tua conplebuntur volumine isto quod ego do tibi et comedi illud
et factum est in ore meo sicut mel dulce
et dixit ad me fili hominis vade ad domum Israhel et
loqueris verba mea ad eos
non enim ad populum profundi sermonis et ignotae linguae tu
mitteris ad domum Israhel
neque ad populos multos profundi sermonis et ignotae linguae
quorum non possis audire sermones et si ad illos mittereris
ipsi audirent te
domus autem Israhel nolent audire te quia nolunt audire me
omnis quippe domus Israhel adtrita fronte est et duro corde
ecce dedi faciem tuam valentiorem faciebus eorum et frontem
tuam duriorem frontibus eorum
ut adamantem et ut silicem dedi faciem tuam ne timeas eos
neque metuas a facie eorum quia domus exasperans est
et dixit ad me fili hominis omnes sermones meos quos loquor
ad te adsume in corde tuo et auribus tuis audi
et vade ingredere ad transmigrationem ad filios populi tui
et loqueris ad eos et dices eis haec dicit Dominus Deus si
forte audiant et quiescant
et adsumpsit me spiritus et audivi post me vocem
commotionis magnae benedicta gloria Domini de loco suo
et vocem alarum animalium percutientium alteram ad alteram
et vocem rotarum sequentium animalia et vocem commotionis
magnae
spiritus quoque levavit me et adsumpsit me et abii amarus
in indignatione spiritus mei manus enim Domini erat mecum
confortans me
et veni ad transmigrationem acervum novarum frugum ad eos
qui habitabant iuxta flumen Chobar et sedi ubi illi sedebant et
mansi ibi septem diebus maerens in medio eorum
cum autem pertransissent septem dies factum est verbum
Domini ad me dicens
fili hominis speculatorem dedi te domui Israhel et audies
de ore meo verbum et adnuntiabis eis ex me
si dicente me ad impium morte morieris non adnuntiaveris ei
neque locutus fueris ut avertatur a via sua impia et vivat ipse
impius in iniquitate sua morietur sanguinem autem eius de manu
tua requiram
si autem tu adnuntiaveris impio et ille non fuerit
conversus ab impietate sua et via sua impia ipse quidem in
iniquitate sua morietur tu autem animam tuam liberasti
sed et si conversus iustus a iustitia sua fecerit
iniquitatem ponam offendiculum coram eo ipse morietur quia non
adnuntiasti ei in peccato suo morietur et non erunt in memoria
iustitiae eius quas fecit sanguinem vero eius de manu tua
requiram
si autem tu adnuntiaveris iusto ut non peccet iustus et
ille non peccaverit vivens vivet quia adnuntiasti ei et tu
animam tuam liberasti
et facta est super me manus Domini et dixit ad me surgens
egredere in campum et ibi loquar tecum
et surgens egressus sum in campum et ecce ibi gloria Domini
stabat quasi gloria quam vidi iuxta fluvium Chobar et cecidi in
faciem meam
et ingressus est in me spiritus et statuit me super pedes
meos et locutus est mihi et dixit ad me ingredere et includere
in medio domus tuae
et tu fili hominis ecce data sunt super te vincula et
ligabunt te in eis et non egredieris in medio eorum
et linguam tuam adherescere faciam palato tuo et eris mutus
nec quasi vir obiurgans quia domus exasperans est
cum autem locutus fuero tibi aperiam os tuum et dices ad
eos haec dicit Dominus Deus qui audit audiat et qui quiescit
quiescat quia domus exasperans est